СДСM продолжува да шири страв и вештачки да предизвикува паника кај граѓаните. Завршија со мрачните сценарија дека државата само што не банкротира, дека цените на производите енормно ќе се зголемат, дека инфлацијата многу ќе порасне, дека цените на нафтените деривати ќе рушат рекорди, дека мигранти ќе дошле, сега СДСM се фати со Пензискиот фонд. Ниту ПИОМ е пред колапс, ниту пензиите се загрозени, пишува ВМРО-ДПМНЕ..
Апокалиптичните сценарија што сака да ги наметне СДСM за пензиите, ќе им пукнат како меур од сапуница, исто како што им пукнаа и за сите претходно набројани.
Пензискиот фонд е стабилен и пензиите редовно и навремено се исплаќаат. Згора на тоа пензионерите веќе две години по ред добиваат пензии за седум илјади денари линеарно покачени.
Со ВМРО-ДПМНЕ на власт, највозрасната категорија граѓани кои својот живот и работен век го посветиле на градење на Македонија, го добија заслуженото, повисоки пензии за достоинствен живот.
За разлика од периодот на власт на СДСM и министер за труд и социјална политика, Јованка Тренчевска која сега од партиската говорница шири хистерија и паника, пензионерите добиваа минимално покачување на пензиите, власта немаше слух за нивните проблеми, а граѓаните од третото доба беа оставени на милост и немилост, со празни тегли да протестираат за повисоки примања.
СДСM и Тренчевска кои беа против зголемувањето на пензиите, сега излегуваат и велат дека не се зголемија колку што требаше. Да се прашуваа СДСM, веројатно зголемувањето на пензиите ќе беше како во нивно време кога за времетраење на мандатот, на месечно ниво просечно се зголемуваа по 90 денари.
И уште нешто, кога веќе СДСM зборува за некаков ризик и загрозување, им порачуваме да се свртат кон самите себе, затоа што во моментов, поради недовербата на граѓаните и внатрепартиските проблеми, единствено СДСM е загрозен од опстанок на политичката сцена.
