Владејачката ВМРО-ДПМНЕ обвини дека лидерот на СДС, Венко Филипче, безрезервно ја следи политиката на својот претходник Зоран Заев, продолжувајќи со, како што велат, погубни и попустливи политики што ги загрозуваат националните интереси. Од партијата порачуваат дека Филипче не само што не се дистанцира од заевизмот, туку активно го прифаќа моделот на криминал, корупција и отстапки на штета на државата.
„Филипче не се одвојува од сенката на Заев, туку напротив, ја продолжува линијата на неговото дејствување. Наместо да застане во одбрана на македонските интереси, Филипче промовира политика на попуштање и отстапување, идентична на онаа што ја водеше Заев“, се наведува во соопштението.
Од ВМРО-ДПМНЕ потсетуваат дека за време на владеењето на Заев, Македонија влезе во процес на преговори со Бугарија под услови што, според нив, значеле директно нарушување на националниот идентитет и интереси. Според партијата, истата политика денес ја продолжува Филипче, што било потврдено и со неодамнешното признание на министерот за надворешни работи, Бујар Османи, дека преговори за етнички прашања се водат со одобрение од страна на СДС.
„Наместо државнички став, СДС избира попустливост и сервилност. Последните анкети само ја потврдуваат оваа реалност, бидејќи половина од граѓаните не го препознаваат Филипче како сериозен лидер на опозицијата“, велат од ВМРО-ДПМНЕ.
Партијата дополнително истакнува дека политиките на СДС и понатаму остануваат синоним за неспособност, криминал и предавства, што според нив, е сериозна закана за иднината на државата.
