Се уште неизвестна судбината на новата болница во Штип. Засега нема ништо од најавата дека овој месец ќе биде распишан нов тендер за изградба на објектот што се гради речиси осум години. Пртходниот министер за здравство Фатмир Меџити ветуваше дека во февруари работите конечно ќе тргнат од мртва точка, за денеска од кабинетот на новиот министер Илир Демири да информираат накратко дека во најбрзо време ќе излезат со став во однос на болниците во Штип и Кичево.
И додека се чека дали ќе се распише или не тендер за доизградба, граѓаните скептични. Не веруваат дека ќе дојде денот кога Штип и источниот регион ќе добијат нова и модерна болница..
„Тој споменик горе, којзнае дали ќе се изгради. Додека имаме вакви влади ќе биде вака, ќе немаме ништо. Празни ветувања се, но да видиме што ќе биде. Никогаш нема да се изгради. Јас живеам на дваесетина метри од болницата, жив човек не сум видел. Политичарите можат да ви кажат. Додека не се споат ВМРО и СДСМ, ништо нема да тргне во Македонија. Треба да се изграде и мислам дека Штип конечно треба да добие нова болница„ велат анкетираните граѓани.
Новата болница во Штип почна да се гради во март 2016 година и требаше да биде готова за две години. Но со смената на власта се сменија и роковите. Додека министер беше Венко Филипче, рокот се плолонгира и истата требаше да биде готова до септември 2019, за потоа неколку години подоцна претпоследниот министер Меџити да даде нов датум, а тоа 2026. Досега е изградено само 40% од планираното.
Александра Ристевска
