Се договорија за рочноста, а дополнително ќе разговараат за каматата на кредитите за бизнисот во висина од 250 милиони евра обезбедени со заемот од Унгарија. На првата средба, Владата и банкарите се согласија за помал рок за враќање на кредитите од 12 години и грејс период до најмногу 3 години. Ова беше барањето на банкарите затоа што средствата во кои се инвестира најчесто се амортизираат до најмногу 10 години, па во моментов тоа е и најдолгиот период на кој ги даваат кредитите.
За каматата дополнително ќе се преговара. Она што е сигурно е дека владата ќе ги плати оние 3,25% камата. За останатите банкарски трошоци, ќе падне договор на друг состанок. Мицкоски е оптимист дека ќе се најде соодветно решение и вели дека ставовите на Владата од една страна и на банкарите од друга почнуваат да се доближуваат.
„Тие 3,25 проценти секако ние како Влада ќе ги платиме. Можеби за некоја година би издале еврообврзница со која предвреме би го вратиле овој креди, бидејќи знаеме дека немаме таму каматна стапка. Можеби ќе се одлучиме за некакви други механизми во зависност од интересот на државата. Целта е каматата којашто ќе ја понудат банките да биде што е можно пониска за да може стопанството да добие пониска камата. Сега реално има трошоци коишто ги имаат банките, но да видиме што може од тие трошоци да се намали, зависи тука и од полтиките на централната банка. Затоа велам да не зборуваме сè уште за проценти, да ги доближиме ставовите и тогаш ќе излезме официјално со позиција“ – вели Христијан Мицкоски – претседател на Влада.
Очекувањата на премиерот се дека фирмите ќе ги добијат кредитите со стапка од 3,25%, истата под која државата ќе го враќа заемот од Унгарија. Владата бара деловните банки да ја субвенционираат разликата од 3,25% камата до реалната висина на вкупните банкарски трошоци. Тој во неколку наврати претходно истакна дека банките имаат големи профити и дека треба да бидат општествено одговорни, односно да преземат дел од кредитниот ризик. Досега само една банка била подготвена да субвенционира дел од трошоците за каматата на кредитите. Инаку, сите банки биле заинтересирани да се вклучат во проектот за 250 милиони евра кредити за стопанството. Бизнисот, пак, со нетрпение ги очекува овие пари и се надева на што побрз договор меѓу владата и банкарите. Проектите за инвестициите биле готови, се чекало само на евтините кредити. Сметаат дека ако се реализираат овие нивни вложувања, тоа ќе го покрене економскиот раст на повеќе од просечните 1.8% изминатиов период.
