Вевчани денеска го слави Денот на непокорот – 39 години од Вевчанскиот случај, а Општината 30 години од постоењето.
Во рамките на одбележувањето во мултикултурен центар „Коста Србакоски“ ќе се одржи свечена академија по повод 30 години Општина Вевчани и концерт на класична музика со Елена Шутиноска. Предвидено е отворање на 8-та ликовна изложба „Вевчанските уметници од Вевчани за Вевчани“, а за забавниот дел е задолжена Анита Мицова.
Седми август, според градоначалникот Спасе Кочовски, е значаен датум за вевчанската историја.
– Постојат датуми што не се само дел од календарот – тие се дел од нашиот идентитет. Седми август е ден што ја носи симболиката на Вевчанскиот непокор – ден на достоинството и непокорниот дух на Вевчанци. Оваа година, кога Општина Вевчани одбележува 30 години од своето постоење, овој датум добива уште посилна симболика и значење, истакна Кочовски.
Вевчани и вевчанецот, нагласи тој, станаа пример за непокор и достоинство. Во август 1987 година жителите на Вевчани се спротивставиле на одлуката на тогашните власти за пренасочување на водата од Вевчанските извори во селото Октиси и населбата Елен Камен кај Струга. „Вевчанскиот случај“ почнал на 5 и 6 август, кога и покрај договорот на месните заедници од Вевчани и Октиси да се постават цевки од Вевчанските извори за водовод во селото Октиси со помал пречник, мештаните затекнале многу поголеми. На тоа се спротиставило локалното население од Вевчани. Со жив штит не дозволувало поставување цевки за водоводниот систем. Немирите кулминирале на 7 август, кога специјалната полиција за да го растера народот употребила електрични палки, а повеќе лица биле уапсени.
