Владата на Венецуела изрази загриженост по изјавите на американскиот претседател Доналд Трамп и најави дека ќе поднесе жалба до Советот за безбедност на Обединетите нации. „Њујорк Тајмс“ прв ја објави веста дека САД се подготвуваат за тајни операции што ќе ги спроведе ЦИА во Венецуела. Многу брзо, овие наводи беа потврдени од американскиот претседател.
„Давам зелено светло за овие акции“, рече Трамп, кој додаде дека сака да спречи пристигнување на големи количества наркотични средства од Венецуела во САД, но и дека јужноамериканската земја ослободува голем број затвореници, вклучително и лица од институции за ментално здравје, и ги испраќа во САД. Венецуелските власти сметаат дека сите акции на САД имаат за цел соборување на сегашното раководство на земјата, со крајна цел одземање на нивните нафтени ресурси.
