Вечерва свечено отворање на комплексот „Македонско село“. Со почеток во 19 часот и 30 минути, овој значаен локалитет за Скопје и Македонија повторно ќе прерасне во средиште на културната интеракција, наследството, изворната архитектура и туристичката понуда на државата.
Македонско село претставува одредиште за локални и меѓународни посетители, за ученици и академци, за творци и научници, за сите оние кои сакаат да ја доживеат душата на Македонија – динамична, срдачна и достоинствена.
„Горд сум на реотворањето на комплексот кој речиси седум години беше затворен и сведочеше за недомаќинско и неодговорно управување во минатото“, изјави директорот на Службата за општи и заеднички работи, Ивица Томовски. Томовски нагласи: „Испраќаме јасна порака – кога постои визија, кога има одговорност и посветена работа, државниот имот може и мора да биде ставен во функција на граѓаните и националниот интерес.“
„Македонско село“, додава тој, „го враќаме како жив симбол на македонската историја, како економски двигател за локалниот развој и како пример дека кога државата управува чесно, резултатите се видливи и трајни“.
