Техничката влада и СЈО конечно треба да заминат во историјата, затоа што беа наметнати ад-хок решенија, кои наместо стабилен и правен систем, донесоа само дисфункционалност, смета поранешниот претседател на Собранието, Трајко Вељановски.
„Секој правен и уставен експеримент предизвикува повеќе штета од корист за државата. Времето и искуството покажаа дека импровизациите во системот не носат квалитет, туку дисфункционалност. Така беше со идејата за техничката влада, така беше и со Специјалното јавно обвинителство“, вели Вељановски во својот статус на социјалните мрежи.
Според него, овие два механизма не биле воведени за да донесат повеќе правда или демократија, туку биле измислени и наметнати со една единствена политичка цел – да се инсталира СДСМ на власт и да се реализира идејата за промена на уставното име.
„Граѓаните не треба повеќе да бидат предмет на манипулација за наводните ‘благодети’ на овие ад-хок решенија“, заклучува Вељановски.
