300.000 квадратни метри зеленило наместо планини од ѓубре. Од депонија Вардариште ќе прерасне во еден од најголемите паркови во Скопје, со огромни зелени површини, терени за спорт и рекреација, патеки, клупи, хортикултурно уредување. Со децении натрупаниот отпад, кој несовесни граѓани постојано го палеа и го загадуваа воздухот во тој дел од градот, станува минато. Како што најави во кампањата градоначлникот Ѓорѓиевски веќе почна да ја чисти една од најголемите диви депонии во Скопје.
„Наместо депонија, според најавите на надлежните, токму овде треба да се изгради голем парк. Простор кој во иднина треба да стане место за прошетка, спорт и рекреација за скопјани.“
Првиот чекор е одгасувањето на депонијата. Од 22 однапред одредени точки, односно бунари, почна да се буши во земјата со цел да се соберат примероци од штетните отпадни гасови кој се наоѓаат во почвата. Потоа ќе се анализираат во специјализирани лаборатории со цел прецизно да се утврди нивното количество и состав.
„Ова е една од вкупно 22те мапирани точки, односно бунари од кои ќе се извлекуваат гасовите што со години се создавале под депонијата. Примероци од нив ќе се испитуваат, со што практично е започнат првиот чекор кон расчистување на теренот.“
Истовремено, депонијата темелно се чисти и од отпадот на површината. Граѓаните велат дека конечно се прави чекор напред. Задоволни се од овој проект бидејќи најважно – ќе биде придобивка за нивното здравје.
„Ако го направи паркот би било супер. Секој ден се труеме овде, ќе дишеме чист воздух.“- велат граѓаните.
Градоначалникот на град Скопје, Орце Ѓорѓиевски ветува дека овој парк ќе прерасне во место каде што граѓаните ќе уживаат, ќе создаваат нови спомени а младите ќе можат да спортуваат. По изградбата на паркот тој најави и нов мост кој ќе ги спои општините Гази Баба и Аеродром, а со тоа и намалување на метежот во оваа околина.
