Уставна жалба е неопходна, но за да можат граѓаните да се пожалат до Уставниот суд за кршење на нивните права, неопходна е промена на Уставот. Со оглед на тоа што отварање на највисокиот правен акт за нас е чуствителна тема, тоа нема да се случи се додека не се создадат услови. Ова е заклучокот од средбата на премиерот Мицкоски и претседателот на Уставниот суд, Костадиновски.
„Промена на Устав е политичка тема. Која што во случајов вклучува правна тема, односно потребата да конечно Уставниот суд некако добие своја тежина во самиот Устав, замислете Уставен суд нема своја тежина во самиот Устав. Од првиот момент на осамостојување до денес ова се провлекува. И сега ние сме дојдени до ситуација кога тоа што претставува товар на минатото треба да го решаваме и ќе го решиме кога ќе се создадат политички услови. Сега во моментот такви политички услови не се создадени. Еве да бидам попрецизен.
Уставниот суд во моментов нема надлежност директно да одлучува по жалби на граѓани за повреда на нивните права. Со уставни измени тоа би се овозможило, а Костадиновски посочува дека потребен е и посебен закон што ќе ја уреди постапката, кој треба да се донесе со двотретинско мнозинство за да се гарантира независноста на судот.
„За воведување на уставна тужба неопходно е уставна измена. Значи, само со уставна измена може да се воведе таква надлежност на Уставниот суд, бидејќи Уставниот суд на Македонија е единствен на европско тло што нема закон за уставен суд. Значи, шест уставни одредби и акт на судот. Толку. Правната рамка е таа. Неопходно е тие шест уставни одредби да се операционализираат со закон, но не било каков закон. Двотретински закон за да ја гарантира самостојноста и независноста, но и за тоа е потребна уставна измена. Значи, и за закон треба уставен основ за таков закон, што ќе се носи со двотретинско мнозинство, и за воведување на уставната тужба потребни се уставни измени, но, како што кажа и претседателот на владата, кај нас отварањето на уставот е секогаш чувствително прашање и тема, и затоа конечниот заклучок, барем според мене, е дека кога ќе се создадат услови, тогаш и ќе пристапиме кон таква институционална реформа.
Двајцата се согласни дека е потребна реформа на Уставниот суд и неговото работење да се регулира со посебен закон како во европските земји.
На тркалзената маса во Уставниот суд за потребата на воведувањето на уставната тужба, се обратија и амбасадорот на ЕУ Македонија Михалис Рокас и амбасадорот на Мисијата на ОБСЕ во Скопје Килиан Вал. И двајцата ја истакнаа потребата од воведувањето на уставната жалба во правниот систем и посочија на можноста да се искористи модел од земјите на ЕУ.
