Успех за Македонија, дебакл за Бугарија. Источниот сосед кој од петни жили за бореше да го оспори македонскиот јазик и идентитет во извештајот за земјава во Европскиот Парламент остана на цедило. Во Комитетот за надворешни работи се покажа недвосмислената поддршка за македонските евроинтеграции. Не успеаа обидите на официјална Софија, во извештајот да стои „современ идентитет или модерен јазик“ – а дипломатските напори на Скопје и подготвеноста да продолжи со процесот го покажаа резултатот.
Македонскиот идентитет и јазик добија широка поддршка, односно „за“ гласаа 40-мина, 19 „против“ и 10 гласаа воздржано. следно, извештајот оди на седница на европскиот парламент, предвидена за јули. по усвојувањето на документот, вајц изрази задоволство бидејќи е изгласан со широко политичко мнозинство.
„Горд сум на целата напорна работа што беше вложена во наоѓањето компромиси за да го донесеме овој добро избалансиран извештај. ЕУ мора да остане обединета со своите соседи во предизвикувачкиот геополитички пејзаж. Македонија припаѓа во ЕУ“ изјави Вајц по усвојувањето, нагласувајќи дека мора да се искористи моментумот за забрзување на процесот на проширување.
Пред гласањето, претседателот на Комитетот ги осуди нападите кон известителот Томас Вајц кои дојдоа од бугарски европратеници, кои реагираа на референците со кои се потврдуваат македонските идентитет и јазик.
„Сакам јасно да укажам дека осудувам секакви лични напади врз известителот во изминатите недели со обвинувања за пристрасност и лоши дејствија поради контакти со функционери од земјата-кандидатка. Ова е погрешно, оти потребно е известителот да ги чуе позициите на државните функционери на кандидатката што ја оценува, за да ги има сите страни при подготовка на извештајот“, изјави Дејвид Мекалистер, претседател на Комитетот за надворешни работи.
Пред гласањето за извештајот, покрај, амандманите од бугарските европратеници Валчев и Ковачев, нов амандман предложи германскиот европратеник Михаил Галер од ЦДУ, односно од Европската народна партија.
„Би сакал да предложам амандман во извештајот едноставно да се стави „модерен“ на четири места пред македонски јазик и идентитет“, рече Галeр.
Сепак, не помина ниту еден од овие штетни амандмани. Реагираше и европарламентарецот Андреј Ковачев од партијата на Бојко Борисов, според која „антиевропските националисти од групата Патриоти за Европа ги блокирале промените во извештајот.
Предлогот на четирите главни парламентарни групи за разјаснување на текстот во врска со македонскиот јазик и идентитет беше блокиран од антиевропските националисти од групата Патриоти за Европа и особено од партијата на Виктор Орбан, изјави Ковачев.
Инаку, во самиот документ се нагласува важноста од задржување на кредибилитетот на проширувањето, се поздравува усогласеноста на Македонија со европските политики, и се повикува на брзо продолжување на преговорите за членство
Следниот чекор е гласањето на пленарната седница на Европскиот парламент, што ќе се одржи од 7 до 10 јули во Стразбур.
