Во Македонија имало голем број обдукции на годишно ниво и добро образовани лекари кои немаат искуство ниту ресурси за да истражуваат, додека Универзитетот Колумбија во Њујорк имал пари за истражување на мозок, но мал број на обдукции кај психијатриски пациенти. Ова е наведено во научна статија од 2013 година како причина зошто за овој проект е одлучено од Македонија да се извезуваат мозоци. Целите на проектот биле да се воспостави систем за собирање примероци за психијатриски истражувања и развој на истражувачка култура во Македонија.
Воспоставување на функционален систем за собирање обдукциски примероци и клинички информации на оптимален начин за психијатриски истражувања.
Развој на истражувачка култура во одредени оддели на Медицинскиот факултет во Македонија до ниво што се очекува од институции во Северна Америка или Западна Европа, Извадок научна статија од 2013.
Целта од добиените резултати од истражувањето била амбициозна. Проучување на невропатологијата на шизофренијата преку систематско собирање мозочно ткиво и детални клинички податоци.
Според она што е објавено во научната статија еден од авторите на проектот од Македонија дошол на Универзитетот Колумбија во Њујорк за да работи на истражувања од областа на невропатологијата. Таму соработувал со американски научник на кого му биле потребни психијатриски обдукциски примероци. Во Скопје, тој веќе бил во контакт со директорот на Институтот за судска медицина и со раководството на психијатриската болница, кои сметале дека Македонија треба поактивно да се вклучи во медицински истражувања.
До 2013 година, преку оваа соработка, во Македонија годишно се собирале меѓу 25 и 75 мозоци за истражувања, кои брзо се обработувале по смртта. Овој материјал бил користен во околу 40 научни проекти во Македонија, САД и Канада.
Како што стои во документот, во Македонија почнала да се гради нова истражувачка култура, биле отворени современи лаборатории, а младите лекари и научници почнале самостојно да објавуваат трудови во меѓународни списанија.
Проектот почнал во 1996 година. Во почетокот, македонските доктори биле само поддршка на странски истражувања, но со текот на времето за нив се напраени обуки во САД, за потоа да земат директно учество во научната работа. Македонските лекари и патолози започнале активно да учествуваат во дизајнот на истражувањата, обработката на податоците и научните публикации.
