Претставници од Управата за јавни приходи учествуваа на 21. состанок на Поткомитетот за трговија, индустрија, царина и оданочување (ПТИЦО), каде што беше презентиран напредокот во областа на даночната политика, правната рамка и усогласувањето со европските директиви. Посебен акцент беше ставен на институционалниот развој, модернизацијата на ИТ системите и јакнењето на административниот капацитет на УЈП, се наведува во соопштението на Управата.
„Европската комисија го поздрави донесувањето на Законот за имплементација на Вториот столб – значаен чекор во борбата против избегнување на данок од страна на мултинационалните компании“, се вели во соопштението.
Дополнително, Европската комисија изразила поддршка за вклучување на Северна Македонија во европски и меѓународни програми за обука, со цел унапредување на стручноста на домашните даночни експерти.
Во однос на размената на информации, беше позитивно оценето тековното ниво на соработка, но беше нагласена потребата за побрзо воведување на автоматска размена на информации како ефикасна алатка во борбата против даночната евазија и перењето пари.
Како клучен предизвик и приоритет за наредниот период, беше посочена потребата од дополнително кадровско зајакнување и инвестиции во ИТ инфраструктурата, со цел поефикасна имплементација на даночното законодавство и дигитализација на услугите.
УЈП истакнува дека останува цврсто посветена на процесот на европска интеграција преку спроведување на реформите, унапредување на даночните практики и зајакнување на институционалниот капацитет, со крајна цел – воспоставување на праведен, модерен и европски усогласен даночен систем.
