Највисокото населено балканско гратче – питомото Крушево, во пресрет на новогодишните празници, блеснува во сиот свој сјај. Новогодишната слика ги подгрева надежите дека за претстојните празници, сместувачките капацитети ќе бидат целосно пополнети.
„За гости, добредојдени се секогаш. Ако немаместо по хотелите, има по куќите. Еве, и јас примав до скоро туристи и беа многу задоволни, оти ние сме гостопримливи и ги задоволуваме луѓето. На сабајле кафе, муабети, за да ни дојдат пак“ – ни рече еден возрасен крушевчанец.
„Никогаш не сме биле без гости. Крушево било и ќе биде Крушево. Крушево е туристичко место. Има сметсување, прибор, јадење, пиење, се има обезбедено во Крушево. Убава природа, кај сакаш да појдеш, да прошеташ, поштени луѓе, домаќини“ – кажа друг крушевчанец.
„Единствено, инфраструктурата треба да се смени. Инаку, се’ останато е супер, и храната, и луѓето. Капацитетите не сме ги користеле премногу, но мислам дека за град од неколку илјади жители е повеќе од доволно“, – истакна турист од Скопје.
Од општината пак, уверуваат дека се вложуваат максимални напори за Крушево да заживее, особено во овие престојни зимски празнични денови.
„Оваа година Крушево на располагање има околу 600 категоризирани места во приватниот сектор и околу 400 места во хотелите. Оваа година за прв пат вклучивме волонтери, заедно со ентузијасти од градот кои навистина сакаат да помогнат да направиме нешто иновативно, поинакво, повпечатливо и попримамливо…затоа што Крушево заслужува да биде вистинска зимска бајка“, – изјави Томе Христоски, градоначалник на Крушево.
„Очекувањата се на максимум. Капацитетите работат максимум, исполнетоста оди се’ нагоре и нагоре. Јас мислам дека во текот на нареднава недела ќе се бара и легло плус“, – кажа Љубица Степаноска, угостителски менаџер.
Локалните власти уверуваат дека Крушево се развива со полна пареа и се’ повеќе зазема значајно место како на домашните, така и на странските туристички мапи.
Каролина Дурло
