Министерот за земјоделство, шумарство и водостопанство, Цветан Трипуновски, денеска го посети Прилеп, каде што се сретна со тутунопроизводители за да разговараат за завршената реколта и подготовките за идната реколта во 2025 година.
„Во текот на вчерашниот ден ги исплативме субвенциите за реколта 2024 година. Станува збор за околу 40 милиони евра субвенции кои беа исплатени на сметките на приближно 14.500 тутунопроизводители низ целата држава. Ова е рекордна исплата на субвенции по произведен килограм тутун“, изјави министерот Трипуновски.
Тој додаде дека целокупната реколта оваа година изнесува 24 милиони килограми, што претставува значително зголемување во однос на минатата година. Според министерот, оваа исплата и успешната откупна сезона ја потврдуваат посветеноста на Владата и Министерството за земјоделство кон реализацијата на ветеното.
„Го цениме трудот на македонските земјоделци, а субвенциите ќе продолжат да се исплаќаат редовно“, нагласи Трипуновски.
