Министерот за земјоделство, шумарство и водостопанство, Цветан Трипуновски, на денешната прес конференција информираше дека од вкупно 1.600 доставени понуди за закуп на земјоделско земјиште во државна сопственост, донесени се 982 одлуки, кои опфаќаат површина од приближно 2.862 хектари.
„Секое ветување кое го дадовме во изминатиот период, работиме на негово целосно реализирање“, истакна Трипуновски.
Тој потсети дека на крајот од 2024 година беа објавени пет јавни повици за закуп на државно земјоделско земјиште, и тоа на површини до и над 3 хектари. Еден од повиците се однесуваше и на земјиште со постоечки насади, со што се овозможи нивна легализација од страна на земјоделците.
„Со распределбата и легализацијата на насадите, сопствениците добиваат можност да склучат договор со Министерството, со што се воспоставува ред во користењето на државното земјоделско земјиште“, нагласи министерот.
Во изминатиот период, до Министерството пристигнаа околу 1.600 понуди за закуп, како и 220 барања за легализација на земјиште со долгорочни насади. Овие бројки, според Трипуновски, ја потврдуваат високата заинтересираност кај земјоделците.
„Слободно можам да кажам дека успешно ги спроведовме јавните повици за закуп на земјиштето. Процесот се одвиваше транспарентно, без селективност, и опфати земјоделско земјиште надвор од градежните реони на сите општини во земјата“, изјави Трипуновски.
Тој додаде дека комисиите напорно работеа на обработка на сите пристигнати понуди, а дел од договорите веќе се доставени до подрачните единици на Министерството и наскоро ќе бидат врачени на земјоделците кои ги добиле.
Од вкупно 1.600 понуди, донесени се 982 одлуки за доделување земјиште со вкупна површина од околу 2.862 хектари. Од 220 понуди за легализација на насади, донесени се 160 одлуки, кои опфаќаат 380 хектари.
„Во претстојниот период ќе распишеме нови огласи за доделување на државно земјоделско земјиште, со цел да се стави во функција преостанатиот потенцијал и да се создадат услови секој заинтересиран граѓанин да се вклучи во производството на храна. На тој начин отвораме нови можности за младите, сточарите и сите кои сакаат да се занимаваат со земјоделство“, порача министерот.
„Земјоделското земјиште е основата на земјоделското производство. Секоја педа земја во државна сопственост ќе биде транспарентно распределена на оние кои сакаат да ја искористат оваа можност и да придонесат во производството на храна“, заклучи Трипуновски.
