Доналд Трамп размислувал да ѝ даде крстосувачки проектили „Томахавк“ на Украина, но тие засега не биле вклучени во листата на оружја што треба да ги добие Киев, објави „Вашингтон Пост“.
САД ги користеа овие проектили во нападот врз Иран минатиот месец, а Украина со нив би можела да ги гаѓа дури и Москва и Санкт Петербург. Извор од Белата куќа кажа дека Трамп е решен да изврши поголем притисок врз Владимир Путин со цел да се постигне прекин на огнот во Украина. Во телефонски разговор минатата недела, Трамп го прашал Зеленски зошто досега не ја гаѓал Москва. „Би можеле ако ни дадете оружје“, рекол Зеленски, на што Трамп одговорил: „Украина мора да изврши поголем притисок врз Путин, не само Москва, туку и Санкт Петербург“.
Трамп вчера ветил нова воена помош за Украина, што ќе вклучи ракети „Патриот“, артиљерија и противвоздушни системи. Оружјето ќе им биде продадено на членки на НАТО, кои потоа ќе го префрлат во Украина. Вредноста на целиот пакет е проценета на 10 милијарди долари.
