Трајко Славески е предлогот на претседателката за нов гувернер на Народната банка, соопштуваат од кабинетот на Гордана Сиљановска Давкова. Предлогот е веќе во Собрание, а пликото со документот од претседателката ќе се отвори утре кога ќе почне работното време на архивата – потврдуваат собраниските служби.
Од кабинетот на претседателката велат дека таа при донесувањето на одлуката се водела од стручноста и компетентноста, дигнитетот и интегритетот, како и реалната можност за именување на кандидатот. – Би сакале да потенцираме дека изборот беше тежок, со оглед на докажаниот квалитет на сите кандидати, велат од кабинетот на македонската претседателка.
Трајко Славески е поранешен министер за финансии и актуелен претседател на Советот на Град Скопје. Зад себе има богата академска и политичка кариера. Редовен професор е на Економскиот факултет при УКИМ, каде што и самиот ги минал сите скалила од додипломските студии до докторат.
