Кандидатот за градоначалник на Скопје, Александар Трајановски од коалицијата „Искуство за успех“, најави дека летната сцена во Градскиот парк ќе го добие името „Аки Рахимовски стејџ“, во чест на легендарниот пејач на групата „Парни Ваљак“. Со ова ветување, Трајановски најави симболично враќање на духот на градот што отсекогаш живеел преку своите музичари, фестивали и уметници, пишува во денешното соопштение на коалицијата „Искуство за успех“.
– Аки Рахимовски остави неизбришлива трага во музичката историја на регионот, а неговиот дух е длабоко поврзан со Скопје. Време е градот да му оддаде трајна почит – со сцена што ќе живее преку новите генерации музичари и уметници, смета Трајановски.
Како што се додава во соопштението, во неговата програма предвидува враќање на Скопскиот фестивал, што со децении беше симбол на македонската музичка традиција и новите уметнички струи. Фестивалот, како што појаснува Трајановски, повторно ќе ја обедини домашната сцена и ќе ѝ даде простор на младата генерација автори, изведувачи и композитори.
– Истовремено, во план е и формирање на градски театар, што ќе биде современ културен простор за драмски и сценски претстави, како и создавање на прв ромски театар во земјата – институција што ќе ја негува и промовира ромската култура, јазик и традиција. Посебен дел од оваа иницијатива е посветен на Есма Реџепова, преку подигнување на споменик и организирање годишен концерт на ансамбли и оркестри во нејзина чест, се наведува во соопштението.
Според Трајановски, Скопје мора повторно да биде град што создава и инспирира.
– Градот на сцените, музиката, гласовите и луѓето кои го прават уникатен, смета Трајановски.
Со овие проекти, се истакнува во соопштението, Скопје ќе го врати својот културен сјај и ќе ја потврди позицијата на град што ја вреднува уметноста, се сеќава на своите легенди и создава нови генерации што ќе ја продолжат таа приказна.
