Полицијата подеднакво ќе одговори на сите обиди за нарушување на мирот и безбедноста. МВР води непристрасни истраги за сите инциденти со палењето на знамињата и возилата во Куманово, а сомнежите се дека зад нив стојат организирани групи. Секој еден кој потикнува каква било омраза или подгревање на меѓуетнички тензии во Македонија ќе се најде пред лицето на правдата, дециден е министерот за внатрешни работи, Панче Тошковски.
- „Тие сторители на кривични дела,319 од КЗ, се млади луѓе кои што не се во години на зрелост, се надевам дека биле изолирани инциденти, но не ми личи на таква работата… За случајот во Скопје можеме да се сомневаме дали децава предизвикале случајно или некој соодветно ги мотивирал, но во вториот случај со палењето на возилата станува збор за добро организирана група“,изјави Тошковски.
Нов обид за манипулација со јавноста е интерпелацијата од Европскиот фронт, вели Тошковски, за обидот на интегративците да иницираат негово разрешување.
- „Тезите кои што се поставуваа во изминатиот период од страна на опозицијата, особено од страна на ДУИ особено се сами по себе контрадикторни. Така да сметам дека македонскиот граѓанин и македонскиот народ, многи добро знае што стои зад оваа интерпелација од аспект на нивно барање. Нека им е со среќа! Ќе си постапи Собранието во насока на она што смета. Јас искрено сметам дека ова е еден низок обид за манипулација на јавноста!“ потенцира министерот.
Пратеничката група на Европскиот фронт, вчера поднесе интерпелации за министерот Тошковски и неговиот заменик Астрит Исени, кои, како што велат, се главно одговорни за инцидентите на Денот на албанското знаме.
Според министерот Тошковски, во врска со инцидентите од минатата недела кога во одделни случаи беа сквернавени државното знаме, албанското национално знаме, но и државни симболи на Република Србија, досега се приведени вкупно 18 лица, а четворица од нив се во притвор.
