Министерот за внатрешни работи, Панче Тошковски, денеска беше во работна посета на СВР Охрид и Полициската станица за граничен премин „Св. Апостол Павле“, која се наоѓа на Аеродромот во Охрид.
Од посетата беше утврдено зголемување на бројот на патници на овој граничен премин, како и на сите други гранични премини во рамките на Регионалниот центар – Запад.
„Во споредба со истиот период минатата година, оваа година имаме за околу 20% повеќе патници на граничниот премин на Аеродромот и за околу 30% на граничниот премин „Блато“ кај Дебар. Се фокусираме на подобрување на техничките услови и зголемување на човечките капацитети за да можеме соодветно да одговориме на зголемениот број патници во овој период. Добро е што имаме зголемена размена на туристи и сакаме тој број да продолжи да расте, за што повеќе туристи да ги видат убавините на Охрид и Македонија“, изјави министерот Тошковски.
Министерот додаде дека МВР и СВР Охрид ги преземаат сите неопходни мерки за да се обезбеди безбедноста на туристите и да можат тие да уживаат во својот одмор, како во рамките на СВР Охрид, така и на територијата на целата држава.
