Според првичните информации, причина за вчерашната сообраќајна несреќа во која загинаа три лица, а осум беа повредени, е неприлагодената брзина на патот, изјави министерот за внатрешни работи, Панче Тошковски, кој денеска е во посета на СВР Охрид.
„Во синоќешната сообраќајна несреќа, за жал, животот го загубија три лица. Според првичните информации што ги добив, станува збор за огромна неприлагодена брзина на еден од учесниците, кој, за жал, е починат“, изјави Тошковски.
Министерот додаде дека бројот на сообраќајни жртви во првото тримесечје од годинава е отприлика сличен како минатата година, но како што оцени, бројките се катастрофални во споредба со европските стандарди.
„Во иднина, максимално мора да се фокусираме на поголемо смирување на сообраќајот од секој аспект, како и на имплементирање на проектот „Безбеден град“ на целата територија на државата“, нагласи Тошковски.
Минатата недела, како што соопшти, на ЕНЕР се ставени дел од потребните закони за имплементација на проектот „Безбеден град“.
Сообраќајната несреќа се случи вчера меѓу Кичево и селото Трапчин дол. Според првичните информации што ги даде портпаролот на СВР Охрид за МИА, во несреќата учествувале три возила.
