Најавата за уште еден топлотен бран повторно го зголемува ризикот од пожари во Штипско. Регионот летово беше меѓу најпогодените во државата. Особено ризични остануваат планинските предели, каде теренот најчесто е непристапен и стрмен. Од штипската противпожарна единица велат дека меѓу најкритичните точки и понатаму е планината Серта.
„Критични места се регионот кон општина Карбинци, планината Плачковица, од другата страна Трогерци, каде граничиме со општина Свети Николе, па следува Серта со селата Лакавица, Лесковица, Селце, Пухче. Овде имаме критични села, непристапен терен, со многу падната маса, што ни го отежнува гасењето на пожарите“, изјави Благој Ренџов, командир на ТППЕ-Штип.
Според Ренџов, штипската противпожарна единица во моментот е добро технички опремена и има солиден возен парк. Недостигот од пожарникари се надополнува со помош од Дирекцијата за заштита и спасување.
„ДЗС од почетокот на сезоната ни донесе возила на интервентната пожарна. Располагаме со четири ПИНЦ-а, два БТР-а, нонстоп имаме лица од Дирекцијата кои дежураат овде, кои се овде 24 часа и кои навистина ни помагаат во гаснењето на огнените стихии“, изјави Ренџов.
Од штипската противпожарна единица потсетуваат дека најголем дел од пожарите се последица на човечко невнимание. Само од јуни до август годинава во земјава се регистрирани 1.696 пожари, од кои 69 биле шумски, додека останатите биле на сува трева, стрништа и депонии. 2022 година ќе остане запаметена како година со најголеми штети врз шумскиот фонд.