Европа треба да се гради врз заеднички вредности, а културните, верските и националните различности да бидат основа за дијалог и меѓусебно разбирање, а не за поделби, беше еден од клучните заклучоци на Меѓународната конференција „Цивилизациските основи на Европа – 1700 години од христијанството во Грузија“, што се одржа во Тбилиси.
На конференцијата, како што соопшти Секторот за комуникации и односи со јавноста на Собранието, која од 2 до 4 октомври ја организираа Интерпарламентарното собрание на православието и Парламентот на Грузија, учествувал и пратеникот и шеф на Делегацијата на Собранието во Интерпарламентарното собрание на православието Миле Талевски, кој е и член на Меѓународниот секретаријат на организацијата.
Во своите обраќања, претседателот на Грузија Михаил Кавелашвили и премиерот Иракли Кобахидзе го нагласиле значењето на христијанското наследство во развојот на европскиот идентитет и улогата на Грузија како мост меѓу Истокот и Западот.
Во рамки на конференцијата биле одржани две тематски сесии посветени на христијанските вредности во време на кризи, како и на улогата на семејството и традиционалните вредности во креирањето на јавните политики.
На крајот од собирот била усвоена Декларација за цивилизациските темели на Европа и 1700 години христијанство во Грузија, во која се содржани главните пораки и заклучоци од конференцијата, а во рамки на настанот е промовиран и томот „Аја Софија – црквите на мудроста Господова низ светот“ на грузиски јазик.
На собирот присуствувале парламентарци од повеќе европски држави, претставници на Европскиот парламент, меѓународни институции, верски заедници и академската јавност, кои дискутирале за улогата на христијанството во современа Европа, зачувувањето на духовното и културното наследство и јакнењето на меѓурелигискиот дијалог.
