Иако рокот за издавање на возачки дозволи е продолжен до крајот на годината, сепак добар дел од граѓаните денеска не влегоа во своите автомобили. Се плашат од казни. Ќе чекаат одлуката да излезе во Службен весник . Во Штип денеска принудно се паркирани од 30 до 50% од такси возилата. Ваква ќе биде ситуацијата во наредните седум-осум денови. Од штипското Зружение на такси превозници велат, дека не се нафаќаат на своја рака да возат, се додека истата не стане правосилна.
„Ние имавме над 50% со стари возачки дозволи. Не смеевме да си дозволеме ризик 10 до 15возила да бидат на терен и ако се случи нешто ние да бидеме виновни„ изјави Глигор Арсов претседател на Здружение на такси превозници во Штип.
Штипските таксисти засега немат проблем со новите налепници НМК. Сите возила им се редовно регистрирани и се со нови регистарски таблички. Во план се да поднесат иницијатива за професионалните шофери меѓу првите ги обноват своите документи.
„Зборуваме за професионални возачи и најверојатно ќе бараме и некоја привилегија да можеме меѓу првите да ги промениме возачките дозволи„ изјави Арсов.
По настанатиот хаос и најавата дека од денеска нема да важат сообраќајните документи со Република Македонија, вчера во Собранието се донесоа нови измени со кои рокот за обновување се пролонгира до крајот на годината. Претходно Министерството за внатрешни работи објави дека во случај на настаната штета при евентуална сообраќајна несреќа, доколку имат невалидна возачка дозвола, граѓаните сами ќе мора да си ги сносат последиците околу истата.
Александра Ристевска
