Државата мора да направи храбри реформи за економскиот раст на Македонија да се изедначи со европскиот. Во спротивно ќе каскаме зад нив уште 30 години. Ова се препораките на Светска Банка во најновиот извештај за бизнисот кој го презентираа пред пратениците во Собранието. Во моментов, само 4% од нив извезуваат, само 12% вложуваат во иновации, ретко кој го проширува асортиманот на производи, тешко доаѓаат до кредити поради немање гаранции и слаба финансиска писменост. Банката бара нова стратегија за привлекување странски инвестиции, бидејќи било надминато времето на вработување кадри кои примаат ниски плати.
Од Фискалниот Совет велат дека македонските граѓани и фирми треба да ја променат свеста, бидејќи никој не сакал да плаќа даноци, а сите барале подобри услуги кои се финансираат од буџетот. Сепак, нотираат дека наплатата на даноците значително се подобрила во изминатите 4 месеци.
Од Управата за јавни приходи велат дека пред нив има многу предизвици. Директорката вели дека активно работат да ги спречат грешките при одданочувањето, да се обезбедат повеќе дигитални услуги, а особена реформа ќе биде е-фактурата која треба да се воведе до 2026-та година.
Пратеникот на ВМРО-ДПМНЕ Бојан Стојаноски одговара дека следат реформи за да се подобри животниот стандард. Рекордно високото ниво на капитални инвестиции и елиминирањето на дел од административните бариери, треба да привлечат нови странски инвеститори. Инаку Светска банка претходно побара од Владата низа зголемувања на даноци, придонеси и услови за одење во пензија. Премиерот е дециден дека нема да се оди подоцна во пензија, нема да има покачување на ДДВ-то, а ќе следи жестока борба со сивата економија.
