Нови сведоци на рочиштето за трагедијата во Кочани. И сведокот Христијан Китанов, кој бил чест гостин во кабарето „Пулс“ и бил повреден во пожарот, се приклучува кон кривичниот прогон и најави дека ќе бара отштета.
Јавниот обвинител Борче Јанев го праша дали присуствувал при активирањето на пиротехничките средства, што сведокот го потврди. Сведочеше дека по избувнувањето на пожарот настанало стампедо во кое и тој настрадал – паднал и бил пригмечен од останатите поради тесниот простор. Се здобил со изгореници од втор степен и на лицето.
„Еден полицаец, Драган Казаков, се обидуваше да ме спаси повеќе пати, ама не успеваше. Станав безнадежен, почнав да се гушам, немав ни сила да дишам. Одеднаш Лазо ми рече: ‘Подај ми ја раката да те извлечам’, јас немав сила. Тој ме извлекол со помош на мојот вујко, кој беше во дискотото, ама излегол претходно. Ме извлекле, јас сум бил во несвест. Ме освестија со шише вода и ме качија во приватна кола, кон кочанската болница“, рече сведокот Христијан.
Додаде дека во „Пулс“ полицијата доаѓала за рации за малолетници или кога имало тепачка. На прашање во судницата одговори и дека сопственикот на „Пулс“ се обидувал вечерта да го гаси пожарот.
Сведочеше и Мартина Ристевска, која присуствувала вечерта. Тврдеше дека обезбедувањето вадело луѓе цела вечер. Одбраната постави прашање дали може да се заклучи дека групата „ДНК“ го предизвикала пожарот, а обезбедувачите спасувале, но судот не го дозволи прашањето.
Мартина, снимајќи ги „ДНК“, го снимила и пожарот со својот телефон, како и моментот кога пејачот повикува да се повлечат луѓето и да се спасуваат.
