Струмичко Банско доби ново мултифункционално игралиште кое се простира на речиси илјада квадратни метри, во вредност од околу 6 милиони денари. Ова игралиште е само дел од проектот на Видеолотарија Касинос Австрија, која досега со над еден милион евра обнови и реконструираше 24 спортски игралишта низ целата држава.
Спортот е важен дел за развојот на младите и создавањето здрави животни навики. Во таа насока, жителите на Банско добија ново мултифункционално игралиште, како дел од проектот на Видеолотарија Касинос Австрија, со кој досега се обновени и реконструирани 24 спортски игралишта низ државата.
Игралиштето, кое се наоѓа во рамки на ООУ „Маршал Тито“, е комплетно обновено и е прилагодено за повеќе спортови.
„Поставена е безбедносна ограда како заштита за децата, нов под. Со ова дечињата имаат можност да спортуваат различни видови спортови – фудбал, одбојка, ракомет и кошарка. На овој начин придонесуваме да се унапредат условите во заедницата и да се развива талентот на дечињата кои поседуваат спортски амбиции, за да станат идни спортисти и најдобри амбасадори на нашата земја“, изјави Вики Чадиковска.
Игралиштето се простира на површина од 950 квадратни метри. За реконструкцијата, Видеолотарија Касинос Австрија обезбеди 4,45 милиони денари, додека Општина Струмица вложи дополнителни 1,75 милиони денари.
„Се надевам дека ова игралиште ќе биде максимално искористено од жителите на Банско, како од младите, така и од повозрасните жители кои практикуваат здрави спортски навики“, изјави градоначалникот на Струмица, Петар Јанков.
Од Видеолотарија Касинос Австрија велат дека ќе продолжат да инвестираат во спортската инфраструктура. Во тек се подготовки на нови проекти за реконструкција на игралишта на повеќе локации низ државата.
