Стоматолозите од денес може да аплицираат за лиценци во Министерството за здравство, а рокот за нивно добивање ќе биде ист како и досега, ако не и побрз.
Министерот за здравство Алиу на 9 август соопшти дека Министерството им ги одзема надлежностите за лиценцирање на Стоматолошката комора. Тој рече дека на 8 август, по насоки на стручна комисија, поради констатирани неправилности, им ги одзел овластувањата на Стоматолошката комора, која меѓу другото дава лиценци за работа на лекарите стоматолози.
За тоа како сега ќе се вршат обуки, кои им се потребни на стоматолозите за да добијат лиценца, Алиу кажа дека е разговарано со двата факултета за стоматологија во Скопје и Тетово и тие набрзо ќе излезат со програма и материјал, и врз основа на тој материјал ќе треба да се организираат хибридни обуки.
