Последниот закон потребен од 1 февруари за да почне и официјалното функционирање на системот „Безбеден град“ денеска е пред пратениците.
Станува збор за предлог-законот за изменување и дополнување на Законот за прекршоците, со кој се предвидува можност за примена на технологиите како систем за детектирање преку технички средства и уреди за снимање, кои може да бидат добра алатка за брзо и ефикасно детектирање на сообраќајните прекршоци и спроведување санкции за нив, истакна на прес-конференција пратеникот на ВМРО-ДПМНЕ, Бојан Стојаноски.
„Безбеден град“ е проект зад кој застанаа сите политички фактори. Поддршката е обезбедена на лидерската средба иницирана од претседателот Христијан Мицкоски.
Но Филипче и ова негово СДСМ продолжуваат со деструктивната политика. Со одлуката да не ги поддржат проектот и потребните закони за негово функционирање покажуваат дека не се заинтересирани ниту за проект што овозможува безбедност на граѓаните во сообраќајот.
Дека станува збор за систем што дава резултати, говорат и бројките од Министерството за внатрешни работи.
Колку за илустрација, првиот ден кога почна тест-периодот на 1 декември камерите во Скопје регистрирале 110.000 прекршоци, од кои 90 проценти за брзо возење. Само за еден ден од функционирањето на системот, или на 2 декември, бројката драстично паднала на 50.652 прекршоци.
Во првите осум месеци од 2025 година во сообраќајни несреќи во земјата загинале 91 лице или по 11,3 луѓе месечно. Во 2024 година бројот на жртви на патиштата бил 142 лица или по 11,8 изгубени животи месечно.
Според информациите од МВР, бројката на смртни случаи е намалена од 11 на 2 смртни случаја во декември 2025 и во јануари 2026 година, а бројот на повредени како последица на непочитување сообраќајни правила во споредба со овие педесетина дена е намален за 35 проценти.
Граѓаните со овој проект се заштитени на улиците, а на СДСМ му останува да тоне со своите деструктивни политики.
