Експерти од Словенија, Италија, Австрија или Германија ќе утврдуваат дали се правеле непотребни операции во приватните болници. Листата со имиња на странските експерти, како што најави министерот за здравство Ази Алиу, треба да биде комплетирана денеска.
Министерството за здравство со нив ќе потпише договор со цел да утврдат дали се вршеле непотребни интервенции кај пациенти во приватните клиники.
Одлуката за ангажирање на странски експерти, според министерот Алиу, е заради поголема објективност и утврдување на вистинската слика.
Инаку министерот за здравство, Азир Алиу, се сретна со д-р Сашко Кедев за да разменат информации за наводите за непотребни кардиохируршки интервенции во приватните болници.
Од Министерството за здравство наведуваат дека се отворени за соработка со сите чинители и ги повикуваат сите засегнати страни кои имаат каква било информација за евентуални неправилности во системот, веднаш да се обратат до нив.
Транспарентноста е еден од главните столбови во работата на Министерството за здравство и е од клучно значење за унапредување на процесите во системот, стои во соопштението
Алиу потсети дека од 15 септември сите приватни здравствени установи ќе бидат обврзани да ги пријавуваат сите извршени прегледи и интервенции до Министерството и Управата за електронско здравство.
