Обвинувајќи ја опозицијата за наводни фиктивни термини за добивање личи документи или за само нему познати паралени системи, за нефункционирање на институциите и за бел штарјк на администрацијата, вицепремиерот Фатмир Битиќи, во последниот свој телевизиски настап, индиректно ги призна неуспесите на економските политики на власта што тој ги претставува, констатираат од Социјалистичката партија на Македонија.
– Заради непреболените претседателски амбиции Битиќи не ги согледува негативните појави кај СДС и ДУИ и неправедно обвинува други дека сакаат да ја заробат државата и институциите. Власта на СДС и ДУИ не само што ја зароби туку ја изолира и ја испокраде државата со милијарди евра, осиромашувајќи ги работниците, пензионерите, земјоделците и студентите. Токму од тие граѓани СДС и Битиќи бараат уште еден мандат за да продолжат со крадење, со криминал и корупција, со лажење, со инфлација, со отсуство на раст на БДП и тонење во се подлабока сиромаштија, се вели во партиското соопштение од СПМ.
Социјалистичката партија на Македонија укажува дека токму „колапсот што го предизвикуваат СДС и ДУИ на македонската економија и држава ги принудува граѓаните масовно да се иселуваат“.
