Во опасни услови – со силен ветер и по ноќ, тимот за спасување на планина при Дирекцијата за заштита и спасување вечерва успешно го симна странскиот параглајдерист кој висеше закачен на дрво високо над 30 метри во близина на Крушево. Според информациите, тој се здобил со повреди, но за среќа – не се сериозни.
Несреќата се случила доцна попладнево, кога додека летал со параглајдер, параглајдеристот удрил во високо дрво и останал да виси во воздух. Полициската станица Крушево веднаш ја известила Дирекцијата за заштита и спасување, по што бил активиран специјализираниот тим за планинско спасување.
– Бидејќи локалните сили не можеле да го симнат, итно беше активиран тимот за спасување на планина кој веднаш се упати на терен, изјави директорот на ДЗС, Стојанче Ангелов.
По неколкучасовна акција во многу тешки услови, параглајдеристот е извлечен и предаден на медицински екипи.
