500 милиони евра за бизнисот и општините- Со 65 гласа „за“ , 15 „ против“ пратениците го изгласаа предлог законот за задолжување на Македонија кај Унгарската експорт – импорт банка.
Со половина од парите ќе се финансираат инфраструктурни проекти, за што општините веќе се подготвуваат. Како што беше соопштено претходно, аплицирале 80 општини за 357 проекти. Според најавите за шест дена ќе заврши процесот на евалуација и ќе треба да се изберат проектите со ресорните министерства. Општините ќе ги добиваат парите преку наменска сметка. Што се однесува до средствата за бизнисот, тие ќе добијат можност да искористат евтини кредити.
Главните забелешки на опозицијата пак се за носењето на Законот по скратена постапка во Собранието, иако тие не ја закажаа комисијата за финансирање и Буџет на која требаше да се вкрстат аргументите, па тоа го стори собранискиот спикер Африм Гаши. СДСМ обвинува дека ќе се зголемел јавниот долг, и парите ќе завршеле кај странски компании
Откако законот ќе биде објавен во Службен весник, параф на договорот ќе стават македонската влада и унгарската банка. Заемот треба да се повлече во една транша, а рокот за отплата е 15 години со грејс период од три години и фиксна каматна стапка од 3,25 отсто. Министерството за финансии најавува дека ќе се потпише договор да не се плаќаат провизии од 0,5 отсто годишно за неповлечени средства. Македонија ќе плати провизија правни услуги на независна фирма избрана од Унгарската експорт – импорт банка пред повлекување на траншата во износ од околу 70 илјади евра.
