Дипломатите да се фокусираат на економијата. Амбасадорите и другите претставници во странство можат и тоа како да бидат поддршка на домашните компании. Целта на реформираното Министерство за надворешни работи и надворешна трговија е да се олесни експанзијата на бизнисот во странство, да се идентификуваат деловните можности во други земји, со цел да се подобри конкурентноста на стопанството и да се креираат нови работни места.
Дипломатите треба да ја промовираат македонската економија пред потенцијалните странски инвеститори. Вложувањата во инфраструктура и тоа како треба да ги анимираат странските фирми да ја прошират својата дејност во Македонија.
Современата дипломатија одамна ги надминала само политичките активности. Европратеникот Карло Реслер вели дека Владите преку дипломатите треба да креираат можности за развој мора да ги намалат бариерите во трговијата.
За еден дипломат да биде успешен на полето на економијата треба да поседува знаење за економските прилики, менталитетот и можностите за развој. За бизнис дипломатијата се дебатираше на Меѓународна конференција која се одржа во МНР во организација на Паневропската Унија на Македонија.
