Сто нови возила – нов старт за Пошта. Инвестиција од два милиони евра, со јасна цел – побрза испорака, помалку доцнења и модернизација на систем што со години тапкаше во место. Владата го отвора процесот на обновување на институцијата која треба да биде директен сервис на граѓаните – од најголемиот град до најмалото село. Премиерот порачува – ова не е само набавка, туку почетокот на изгрдбата на еден систем кој ќе ја претвори Поштата, во сервис кој им е неопходен на граѓаните. Од застарен возен парк со просечна старост од 15 години – кон систем кој треба да испорачува брзо, сигурно и без застои.
Во рамки на Планот за раст работиме на конкретни мерки со кои ќе ја зголемиме конкурентноста на нашата пошта.Нашата цел е јасна: да создадеме современа, ефикасна и одржлива институција.Предвидуваме подобрување на ефикасноста во испораката на услугите и намалување на трошоците за најмалку петнаесет проценти.Истовремено работиме на подобрување на индикаторите за профитабилност, исто така за околу петнаесет проценти.Тоа значи подобро управување, подобра организација и подобри резултати, рече Христијан Мицкоски.
Планот е јасен , велат од Владата – нова опрема, намалување на трошоците и враќање на довербата кај граѓаните и бизнисите. Следниот чекор, посочуваат, се конкретни алатки за ефикасност.
Вицепремиерот и министер за транспорт потенцира дека ова е само почеток на поширока трансформација – со нов софтвер и современа сортирка која треба да ја позиционира Пошта како најмодерна во регионот. Освен ова, вели министерот, акцент се става и на економичноста, односно набавката е реализирана со значителна заштеда од околу 400 илјади евра, со просечна цена по возило пониска од пазарната.
Она што сум особено горд е што од проценета вредност од сто триесет милиони денари без данок на додадена вредност, на електронска аукција цената се намали за цели дваесет и пет милиони денари, што значи дека заштедивме некаде над четиристотини илјади евра само при оваа јавна набавка.Финалната цена е сто и четири милиони денари без ДДВ, што прави да ова е најевтина набавка на овој тип на возила реализирани во државата. Некаде просечно доаѓа околу петнаесет, шеснаесет илјади евра по возило, што е далеку, далеку најевтино од она што може да се најде на пазарот, посочи Александар Николоски.
А на терен – најголемиот проблем досега бил токму транспортот. Директорот на Пошта вели – системот веќе почнал да се стабилизира, а новите возила треба да го забрзаат процесот на испорака и да ја олеснат работата на вработените. Во наредниот период, фокусот останува на намалување на администрацијата, зголемување на ефикасноста и дигитализација на услугите.
Со оваа поддршка денес значително ја подобруваме поштенската инфраструктура, олеснувајќи го извршувањето на поштенските услуги побрзо и поефикасно. Нашата посветеност и капиталните инвестиции нема да изостанат.Ние стоиме зад нашите програмски ветувања. За модернизација на пошта преку подобрување на поштенската инфраструктура, обновување на кадрот и подобрување на условите за работа, подвлече Куртиши.
Од 100те возила, 90 се пик-апи, а 10 поголеми возила комбиња. Малите возила се со носивост од 750 килограми, додека големите се со носивост од 1 800 килограми.
