Втора тура пари за општините за инфраструктура. Во вторник на следната владина седница ќе се донесе одлука за распишување на нов јавен повик за локалните власти да конкурираат со проекти. За да нема поголеми проблеми и повторно да не се пролонгира крајниот рок поради нецелосна документација како одобрение за градба, нефиниширан проект и слично, овојпат периодот во кој ќе може да се аплицира ќе биде подолг, односно до крајот на април.
„Јас сум исклучително среќен и задоволен за сето она кое што претставувало претходно проблем за граѓаните, сега се надминува, се решава преку овие средства кои се реалоцирани од буџетот. Се градат улици, се градат патишта, булевари, се градат градинки, училишта, сали, практично капитални инвестиции коишто ќе го подобрат квалитетот на живот на нашите сограѓани“ – рече Мицкоски.
Мицкоски денеска изврши увид во градежните работи на патот Катланово – Градманци во должина од 2,4 километри кој чини 198 илјади евра, како и доизградба на капацитет на градинка која треба да згрижи 70 деца во општина Петровец. Градоначалникот ги реализира овие проекти со пари од унгарскиот кредит од првиот повик на Владата. Оваа општина најавува дека и овојпат ќе аплизира со бројни проекти во вредност од 1,3 милиони евра.
Премиерот уверува дека активно се работи на инфраструктурно поврзување со соседите. Со Косово заеднички ќе се работи на патот Тетово – Призрен на кој треба да има тунел и треба да биде готов за 5 години. Активно се работи и да се продолжи со реализација на делницата Скопје – Блаце, за која Владата најде бројни нерегуларности, особено од страна на ДУИ како дел од претходната Влада.
Во завршна фаза е и проектот за искористување на половина од унгарските пари, кои треба преку банките да завршат кај компаниите кои ќе ги искористат за иден развој. Сите преостанати процедури ќе поминат на владина седница во вторник, по што овие пари ќе станат оперативни за бизнис секторот. Со измени се овозможи што повеќе фирми да ги искористат парите, особено во делот за изградба на енергетски објекти од обновливи извори, како мали хидроцентрали, фотоволтаици и слично.
