Карциномот на дебелото црево, ако се открие навреме, може да се спречи, успешно да се лекува и целосно да се победи. Дигестивните хирурзи велат дека скирингот е златна дијагностика за рано откривање на рак дигестивниот тракт. Добрата вест што ја споделија елакрите, е што се помалку пациенти доаѓаат на лекар во доцна фаза на болеста. Тоа директно значи поголеми шанси за излекување и подобар и квалитетен живот.
„Македонија во последниве години прави сериозни исчекори. Ако пред десет години околу 75 проценти од пациентите беа во трет или четврт стадиум, денес сме сведоци дека пациентите ги откриваме многу порано. Точната бројка не можам да ја кажам, меѓутоа ако се зголемува бројот на лапароскопски или минимално инвазивни интервенции, кои секогаш се поврзани со низок стадиум на болеста.“ – вели проф. д-р Светозар Антовиќ, дигестивен хирург и декан на Медицинскиот факултет во Скопје.
Ракот на дебелото црево е се почест и на глобално ниво и кај нас. Во Македонија, секоја година се дијагностицираат околу илјада нови случаи.
Здравствените власти велат дека се засилуваат програмите за рано откривање. Освен за рак на дебелото црево, се спроведуваат и превентивни прегледи за повеќе други заболувања.
Инаку, денеска во Скопје се одржува 18-тиот Европски конгрес на абдоминални хирурзи. Настанот собира над 40 предавачи и повеќе од 150 учесници од Европа и регионот, со цел размена на најнови знаења и клинички практики во дигестивната хирургија.
