Се разгледува можноста за враќање на скопско сајмиште. Потребата и важноста од изградба на нов саемски комплекс во Скопје, односно враќањето во сопствен објект ќе ја заживее економијата и ќе ја поттикне регионалната трговска соработка. Враќањето на „Скопски саем“ е од исклучителна важност за скопјани, кои ден – денес ја нагласуваат потребата од ваков простор, кој своевремено беше домаќин на бројни манифестации. Идејата за изградба на објект за саемски активноски била во фокусот на средбата помеѓу директорот на Службата за општи и заеднички работи Ивица Томовски со претставници на „Скопски саем“, соопштија од СОЗР.
„Враќањето на „Скопски саем“ во сопствен објект не само што ќе ја оживее економската активност, туку и ќе го зајакне регионалниот и меѓународниот профил на Македонија како важен трговски и деловен центар“, изјавил Ивица Томовски директор на СОЗР
Се разгледува каде би се изградил објектот и се размислува за воведување на иновации со цел новиот саемски простор да биде конкурентен на регионалните и меѓународните пазари. Според директорката на „Скопски Саем“ од исклучителна важност е Скопје да има место кое ќе создава нови можности, ќе отвора простор за меѓународни соработки и ќе отвори нови работни места.
„Саемите претставуваат клучни настани за промоција на македонските производи и услуги, како и за создавање на нови можности за странски инвестиции и соработка. Изградбата на современ саемски комплекс ќе ги отвори вратите за нови можности и ќе создаде услови за зајакнување на економијата“, додаде Глигоровска директорка на „Скопски Саем“
Во текот на своето постоење Скопскиот саем беше домаќин на бројни културни настани, меѓу кои и меѓународни изложби, концерти, саеми на книга, за мебел, за градежништво, модна недела, вински фестивал. Се одржуваа исклучителни фестивали, концерти на светски звезди како на Боб Дилан, на Крафтверк, Молоко, на нашите маестрални Симон Трпчевски, Тоше Проески. Скопски саем банкротираше, па беше затворен во 2017-та година, по што приватна групација го откупи имотот од банките доверители, па некогашниот Саем сега е трговски центар. Саемските манифестации откако скопски Саем беше затворен почнаа да се одржуваат на разни локации, најчесто во Спортскиот центар „Борис Трајкоски “ .
