🎥 Скандалозните измени на Кривичниот законик на поправка во Владата, Собранието ги чека предлозите

Владата работи на поправање на скандалозните измени на Кривичниот законик со кои се намалија затворските казни за висока корупција и злоупотреба на службената положба.

Собранието ги чека предлозите од Владата откако Уставниот суд ја оспори уставноста на измените кои ги донесоа СДСМ и ДУИ шест месеци пред распишување на парламентарните избори.

Според премиерот, со измените ќе се стави крај крај на она што претходната Влада го направи односно „амнестија за криминалот којашто го изгласа во Парламентот здружно злоупотребувајќи го европското знаме“.

• „ Да, во процес е, се работи. Станува збор за членот 353, којшто претходната Влада за да го амнестира криминалот којшто го направи додека се богатеше на грбот на граѓаните и купуваше трговски центри – внуци од лидерот на Демократската унија за интеграција, додека сватови купуваа скапи Мајбах автомобили, додека се издаваа дозволи за фабрики за производство на марихуана, додека се купуваа скапи деловни простории во центарот на Скопје, итн, гласаа во Парламентот здружно злоупотребувајќи го европското знаме за да се амнестираат со измените на Кривичниот законик,“ изјави Мицкоски.

Премиерот порача дека актуелната Влада ќе ги врати еврпските вредности затоа што, укажа, додека претходното владејачко краделе и уништувале седум години.

Инаку уставните судии во февруари годинава одлучија да поведат постапка за оценување на уставноста на измените на Кривичниот законик од септември 2023 година кои вклучуваа намалување на казните за функционерите. Како што изјави тогаш претседателот на Уставниот суд Дарко Костадиновски, Судот изразил сериозен сомнеж за уставноста на оспорениот закон во целина и донел одлука да му наложи на Собранието во рок од шест месеци да ги направи неопходните измени и да се усогласи со аргументите на Судот.

Измените кои ги донесе минатата власт во заминување ги намалија затворските казни за најтешките форми на корупција. Законот се донесе со европско знаменце, во забрзана постапка.