Остри реакциии од Синдикатот на културата на Македонија на новото упатство од Министерството за култура и туризам. Го обвинуваат министерот Љутков дека се обидува да ги заобиколи колективните договори и правосилните судски пресуди за зголемување на платите.
„Министерот им ја честиташе Новата година и божиќните празници на вработените во културата со честитка во форма на „Упатство“, со кое повторно се обидува да го поништи она што судот веќе јасно и недвосмислено го утврди: дека платите во културата мора да се зголемат согласно член 14 став 1 од Општиот колективен договор, односно за 10% од основната бруто плата утврдена со Колективниот договор за културата“, велат од Синдикатот на култура на Македонија.
Од синдикатот велат дека на овој начин, министерот Љутков се поставува над судот, над колективните договори и над законите.
„Синдикатот на културата нема да дозволи платите во културата да се пресметуваат по „министерска математика“, наместо согласно закон и колективни договори. Повторно ќе ги преземеме сите расположливи правни механизми – од управни спорови, до иницирање постапки за утврдување кривична одговорност – со цел да се запре ова самоволие и да се заштитат правата на вработените во културата“, велат од Синдикатот на култура на Македонија.
Во октомври лани, претставници на Синдикатот соопштија дека со добивањето на првата пресуда против надлежното министерство, се потврдува дека правата на културните работници биле прекршени со незаконските решенија за намалување на платите. Претходно имаше и протетсти пред министерството за култура поради ненавремено исплаќање на платите во овој сектор.