Земјотрес со магнитуда од 7,5 степени го погоди североисточниот брег на Јапонија, а властите ги повикаа жителите да се држат подалеку од крајбрежните области каде што се очекуваат цунами-бранови до 80 сантиметри, пренесува Ројтерс. Неколку пристанишни градови, вклучувајќи ги Отсучи и Камаиши – двата тешко погодени од силен земјотрес и цунами во 2011 година – издадоа наредби за евакуација на илјадници жители. Премиерката Санае Такаичи изјави дека владата формирала итна работна група и ги повика граѓаните во погодените области да се евакуираат на безбедно место.
„Сега се испитуваат можни штети и жртви“, изјави Такаичи пред новинарите во нејзините канцеларии во Токио. Во погодените области моментално нема нуклеарни централи во функција, а „Хокаидо електрик пауер ко“ и „Тохоку електрик пауер ко“ информирале дека нема пријавени абнормалности во нивните неактивни постројки таму.
