Претседателката Гордана Сиљановска-Давкова денеска ги прими учесниците на регионалната Конференција на австриски амбасадори од Југоисточна Европа, чиј домаќин е Амбасадата на Република Австрија во земјава и амбасадорот Мартин Памер, на која, како што информираат од нејзиниот кабинет, сите амбасадори отворено го поддржале македонскиот пат кон Европската Унија, потенцирајќи дека европската перспектива на земјите од Западен Балкан и изнаоѓањето решенија за забрзување на интеграциите се во фокусот на нивната регионална конференција.
Сиљановска-Давкова, исто така, нагласила дека делегацијата, предводена од амбасадорка Елизабет Корнфајнд, генерална директорка за европски и економски прашања при Сојузното министерство за европски и меѓународни работи на Австрија, е доказ за синхронизирана и активна дипломатија што е важно за европската перспектива на регионот.
-Таа потенцираше дека Австрија не е само еден од најголемите економски инвеститори во земјава, туку и наш силен политички пријател и гласен поддржувач на проширувањето на ЕУ и на македонскиот евроинтеграциски процес – се вели во соопштението од Кабинетот на Сиљановска-Давкова.
Претседателката го реафирмираше ставот дека интеграциите мора да се базираат исклучиво на Копенхашките критериуми и на заслугите и дека билатералните прашања не треба да бидат инструмент за блокада на овој процес.
Сите австриски амбасадори, се вели во соопштението, отворено го поддржале македонскиот пат кон ЕУ, потенцирајќи дека европската перспектива на земјите од Западен Балкан и изнаоѓањето решенија за забрзување на интеграциите се во фокусот на нивната регионална конференција.
-Тие го делат ставот на Претседателката дека регионалната соработка и пристап се клучни за европските интеграции. Воедно, се согласија дека во актуелниот геополитички контекст, проширувањето на ЕУ претставува безбедносен императив. Повикаа на почитување на владеење на правото, меѓународните договори и меритократијата – се вели во соопштението од Кабинетот на Сиљановска-Давкова.
Соговорниците, исто така, изразиле подготвеност за натамошно продлабочување на македонско-австриските односи и за заедничка европска иднина.
