Штип, Кичево и Тетово се чекор поблиску да добијат гланц нови и модерни болници. Проектите се веќе во министерството за финансии, каде се финализираат анализите, по што се очекува за две недели да довијат зелено светло и од владата. Станува збор за болници кои ќе се градат со Британски пари.
Се уште не е познато колку точно ќе чини целиот пакет, иако проценките се, дека сумата ќе се движи околу 205 милиони евра. Доколку проектот добие зелено светло од Владата, ќе следува потпишување на договорот со Британците. Министерот Алиу вели дека од македонска страна подготовките се речиси завршени.
“Знаете дека програмата е при крај.Јас имав веќе неколку состаноци и со британската влада но и со финансиските институции, ценам дека веќе од наша страна се е завршено…за недела до две Министерството за финансии ќе излезе со информација на некоја од следните седници на Влада за да може да се потпише договор помеѓу нас и финансиската институција” – изјави Азир Алиу, министер за здравство.
Од Владата велат дека инвестициите во здравствениот систем продолжуваат и во наредниот период, со цел модерно, достапно и квалитетно здравство за сите граѓани.
Предвидено е со британскиот договор да се реалзиираат крупни проекти, покрај изградбата на нови болници, ќе има реконструкции на здравствени установи но и нова зграда на Медицински факултет со нов студентски дом. Најави има дека ќе има пари и за нов Клинички центар. Се разгледува локацијата на ГОБ ‘8 Септември’ како потенцијален најголем здравствен комплекс во Македонија.
Изминатите 10-тина години постоеа повеќе идеи за локации– во близина на Бардовци, на излезот од Скопје во Ѓорче Петров или на просторот на касарната „Илинден“ но ништо од тоа не стана реалност.
