По речиси четири години чекање, прекини и неисполнети ветувања од минатата власт, мостот кај „Љубљанска“ конечно добива завршница. Проектот, што требаше да биде готов за помалку од две години, стана еден од најдолгите инфраструктурни застои во главниот град. Новата власт во главниот град уверува дека конечниот изглед ќе биде со повеќе сообраќајни ленти во двата правци, велосипедски патеки, пешачки патеки, паркови и хортикултурно уредување.
Се наоѓаме на мостот кој што ги поврзува улиците „Љубљанска“ и „Скупи“, проект кој со години беше симбол на застој, но сега конечно влегува во својата финална фаза. Надлежните уверуваат дека овој инфраструктурен зафат ќе биде ставен во функција и ќе донесе значително олеснување на сообраќајот во Скопје.
Градоначалникот на Скопје предвидува овој проект да биде готов до крајот на оваа година. Според неговите очекувања, граѓаните со директна врска преку реката Вардар, ќе добијат побрз излез кон обиколницата, а сообраќајот во овој дел од градот ќе се одвива многу полесно и поорганизирано.
Освен што ќе овозможи побрзо движење, мостот треба да придонесе и за подобра поврзаност на населбите како Карпош и Ѓорче Петров и северниот дел од градот. Очекувањата се дека со неговото пуштање ќе се намали и притисокот на булеварите „Партизански Одреди“ и „Илинденска“.
Изградбата претходно беше стопирана заради потребата од дополнителни дозволи за заштита на археолошкиот локалитет Скупи. Надлежните велат дека тие процедури се завршени и дека проектот продолжува да се гради со полна пареа.
Покрај сообраќајното поврзување, најавени се и дополнителни зафати како реконструкција на околните улици, нови пешачки патеки, изградба на нови паркови како и подобрување на целокупната инфраструктура на овој дел од градот.
Изградбата започна во 2021 година, во време на тогашното градско раководство на Петре Шилегов, со план за улица што ќе го поврзе западниот и северниот дел од Скопје. Во планот стоеше мостот да има четири коловозни ленти, пешачки и велосипедски патеки од двете страни и ширина од околу 24 метри.
