Заврши првиот Јавен повик за изработка на проектна документација и поставување на енергетско-ефикасни фасади и реконструкција на кровови на станбени згради за колективно домување во Општина Македонска Каменица.
На повикот се поднесени вкупно шест апликации, за кои по извршената евалуација и рангирање е утврдено дека се комплетни. Сите апликации ќе поминат во следната фаза и ќе добијат проектна документација, која се изработува од страна на партнерите во проектот – Хабитат Македонија.
-Благодарение на професионалноста и ажурноста на Хабитат Македонија, проектната документација за реконструкција на фасада за Заедницата на сопственици „Каменичка 18“ веќе е во завршна фаза, а започнува и изработката на документација за Заедницата на сопственици „Каменичка 20“. Очекувањата се дека и останатите четири Заедници на сопственици од „Гоце Делчев 5“, „Александар Македонски 11“, „Самоилова – Кула 1“ и „Самоилова – Кула 2“ ќе добијат проектна документација во текот на ноември 2026 година, информираа од Општина Македонска Каменица.
Општина Македонска Каменица ги повикува и останатите жители во станбени згради за колективно домување да оформат Заедници на сопственици и да бидат подготвени за повикот кој ќе биде распишан во 2027 година.
Општината за оваа намена одвојува, како што посочуваат, рекордни средства во државата и нуди субвенции до 40 отсто, односно до максимум 1 милион денари по апликација.
