Mакедонските граѓани кои немаат нови патни исправи, немаат ни право да патуваат надвор од земјава. Принудно остануваат дома, заробени како во гето. А такви, кои заради тоталната неорганизираност и неподготвеност на државата навреме да обезбеди нови пасоши, ги има неколку стотици илјади граѓани. Според некои проценки дури и повеќе од 650 илјади. Можеби и затоа на речиси сите гранични премини во земјава, денеска е пуста-пустелија. Вистинска реткост беа граѓаните кои излегуваат од Македонија денеска на Меџитлија.
Целиот овој хаос со кој се соочуваат македонските граѓани околу промената на личните документи, нивните нервози и револтот, денгубењето, но и трошоците со кои се соочуваат, дотолку повеќе иритира ако се суди според сликата на Граничниот премин „Меџитлија“. Таму, нема апсолутно ништо што би укажало на тоа на чија територија се наоѓате.
Во моментов, околу 100.000 македонски граѓани веќе се фотографирани, ама заради недостигот од обрасци, прашање е кога ќе ги добијат новите пасоши.. Според последните најави на техничкиот министер за внатрешни работи, Панче Тошковски околу 250.000 обрасци се очекуваат до крајот на месецов. Сега на располагање имало само околу 15.000 пасоши, од кои 10.000 се албански, а 5.000 македонски.
Каролина Дурло
