Темелната јама на градилиштето во Кисела Вода не била обезбедена, а работниците работеле без основни мерки за заштита на местото каде требало да се гради станбената зграда…ова се главните причини за трагедијата каде загина 34-годишен работник од Крива Паланка, а тројца негови колеги беа повредени.Државниот инспекторат за труд утврди сериозни пропусти во безбедноста при работа на работниците..Според наодите, градежниците биле ангажирани кај подизведувач, но на терен не биле исполнети ни најосновните услови за безбедна работа.
„Од областа на Безбедност и здравје при работа утврдено е дека не биле преземени колективни мерки за заштита, односно не било направено подградување на ивиците на темелната јама или друг начин за заштита од обрушување на земјиштето, што е и причина за несреќата“, информираат од Државниот инспекторат за труд.
По несреќата во Кисела Вода, инспекторатот веднаш го запре работењето на градилиштето.Изречена е усмена забрана за работа, која ќе важи се додека не се отстранат сите пропусти и не се обезбедат неопходни мерки за заштита на работниците.
Од инвеститорот и изведувачот е побарана целата документација поврзана со безбедноста и здравјето при работа.
Во јавноста засега е молк од страна на изведувачот, односно компанијата Јакимовски ДООЕЛ. Од нивната веб страна, може да се видат два проекти, едниот е во Кисела вода, а другиот во скопски Аеродром. Досега ниту еден од оваа компанија не даде никакви информации околу дозволата, документација и дали се работело согласно прописите за безбедност.
Во меѓувреме, Основното јавно обвинителство ја продолжува истрагата за да утврди како дошло до трагедијата. Издадена е и наредба за обдукција на починатиот работник.
