Во Скопје денеска ќе се одржи „Марш за ангелите“, организиран од семејствата на загинатите во трагичниот пожар во дискотеката „Пулс“ во Кочани. Маршот ќе започне во 12:05 часот пред Обвинителството — како симболика за, како што велат, задоцнетата реакција на институциите — ќе продолжи кон плоштадот „Македонија“ и ќе заврши пред Собранието.
Семејствата на жртвите истакнуваат дека нема да престанат да бараат одговори за смртта на нивните деца и ги повикуваат сите граѓани да се приклучат на маршот. Во нивното писмено соопштение се вели:
„Ние заслужуваме одговори. Не сме правници и не разбираме како институциите прво приведуваат, па потоа пуштаат. Свесни ли се какво разочарување и недоверба создаваат ваквите постапки кај нас – луѓе кои се на работ на психолошка издржливост?“
Од Обвинителството, пак, вчера упатија повик до семејствата на настраданите доколку сакаат подетално да се запознаат со истражната постапка. Имено, денеска можат да остварат средба со Јавниот обвинител на Република Северна Македонија и обвинителите кои го водат предметот. Секое семејство има право да назначи по еден претставник за средбата.
Досега семејствата организираа четири протестни маршеви во Кочани, со кои ги повикаа надлежните институции да не ја избегнуваат одговорноста за системските пропусти.
Пожарот во дискотеката „Пулс“ се случи на 16 март и однесе 62 животи, а речиси 200 лица беа повредени. Меѓу загинатите и повредените беа и членови на бендот „ДНК“, кој настапуваше таа вечер.
Во истрагата се вклучени 13 обвинители. Досега се извршени бројни претреси, сослушани се сведоци и собрано е над 1.000 материјални докази. Предметот опфаќа повеќе од 60 физички и три правни лица, меѓу кои поранешни министри, актуелни и поранешни градоначалници на Кочани, директори на Пазарниот инспекторат, полициски службеници и лица од Дирекцијата за заштита и спасување.
