Присуството на премиерот Христијан Мицкоски и делегацијата на владејачката партија на 50-годишнината од формирањето на најмоќната политичка сила во Европа, Европската народна партија, за упатените е силен показател дека Македонија останува цврсто на европската патека.
Престојот на Мицкоски во Брисел, каде во изминатите три дена имаше многу важни средби со влијателни лидери од европската десница, според познавачите е од особено значење, посебно во периодов кога во светот се случуваат глобални потреси со војните во Украина и израелско-американскиот судир со Иран.
Во рамки на средбите со европски лидери, Мицкоски нагласи дека ваквите форуми се важна можност за размена на ставови и зајакнување на партнерствата, со посебен акцент на економските перспективи, глобалните предизвици и процесот на европска интеграција.
Според политичкиот аналитичар Раби Седрак, иако Унијата често знаела да биде нефер кон Македонија, сепак е единственото решение кое државата го има пред себе.
